ajab ahwal dekha is zamane ke amiron ka

ajab ahvāl dekhā is zamāne ke amīroñ kā

na un ko Dar ḳhudā kā aur na un ko ḳhauf pīroñ kā

misāl-e-mahr-o-mah din raat khāte charḳh phirte haiñ

falak ke haath se ye haal hai raushan-zamīroñ kā

qafas meñ pheñk ham ko phir vahīñ sayyād jaatā hai

ḳhudā hāfiz hai gulshan meñ hamāre ham-safīroñ kā

mujhe shikva nahīñ be-rahm kuchh tere taġhāful se

khule-bandoñ phire tū haal kyā jaane asīroñ kā

dil-e-yāqūt hai tujh la.al-e-lab ke rashk se pur-ḳhūñ

tire dandāñ ke aage ghaT gayā hai mol hīroñ kā

kiyā hai us nishāñ-andāz ne tarkash tahī mujh par

mirī chhātī sirā ho jis upar toda hai tīroñ kā

hameñ dīvān-ḳhāne se kisī mun.im ke kyā 'hātim'

hai āzādoñ ke gar rahne ko bas takiya faqīroñ kā

ajab ahwal dekha is zamane ke amiron ka

na un ko Dar KHuda ka aur na un ko KHauf piron ka

misal-e-mahr-o-mah din raat khate charKH phirte hain

falak ke hath se ye haal hai raushan-zamiron ka

qafas mein phenk hum ko phir wahin sayyaad jata hai

KHuda hafiz hai gulshan mein hamare ham-safiron ka

mujhe shikwa nahin be-rahm kuchh tere taghaful se

khule-bandon phire tu haal kya jaane asiron ka

dil-e-yaqut hai tujh lal-e-lab ke rashk se pur-KHun

tere dandan ke aage ghaT gaya hai mol hiron ka

kiya hai us nishan-andaz ne tarkash tahi mujh par

meri chhati sira ho jis upar toda hai tiron ka

hamein diwan-KHane se kisi munim ke kya 'hatim'

hai aazadon ke gar rahne ko bas takiya faqiron ka