عجب اپنی حالت یہ ہم دیکھتے ہیں

عجب اپنی حالت یہ ہم دیکھتے ہیں

کہ آنکھوں کو ہر لمحہ نم دیکھتے ہیں

لگائیں تو کیا ایسی دنیا سے دل ہم

مسلسل جہاں غم پہ غم دیکھتے ہیں

درختوں سمندر ہوا اور فلک پر

عجب اس کا جاہ و حشم دیکھتے ہیں

جو رہتا ہے شہ رگ میں اپنی اسی کو

نہ تم دیکھتے ہو نہ ہم دیکھتے ہیں

ہم اپنے چمن زار ہستی پہ اک دن

ستم زار ملک عدم دیکھتے ہیں

وہ نامہرباں مہرباں ہو گیا ہے

قدم دو قدم چل کے ہم دیکھتے ہیں

نہیں دیکھتے ہیں ترے خواب جب ہم

تو پھر راہ ملک عدم دیکھتے ہیں

الجھتے ہیں جب بھی مسائل میں قیصرؔ

تو اس زلف کے پیچ و خم دیکھتے ہیں