ajab be-kaif hai raaton ki tanhai kai din se

ajab be-kaif hai rātoñ kī tanhā.ī ka.ī din se

kisī kī yaad bhī dil meñ nahīñ aa.ī ka.ī din se

bahut maġhmūm hai shān-e-masīhā.ī ka.ī din se

baḌhī jaatī hai zaḳhm-e-dil kī gahrā.ī ka.ī din se

kalī ne bhī uḌāyā thā mazāq-e-girya-e-shabnam

paḌī hai ḳhaak par ḳhushk aur murjhā.ī ka.ī din se

churā laa.ī hai shāyad nik.hat-e-gul sehn-e-gulshan se

nasīm-e-sub.h kyuuñ phirtī hai ghabrā.ī ka.ī din se

ḳhudā jaane ye ab kyā ho gayā ham bad-nasīboñ ko

ki tere ġham kī lazzat bhī na raas aa.ī ka.ī din se

idhar bhī ik nazar ai mālik-e-vīrāna-o-gulshan

tire kūche meñ phirtā hai ye saudā.ī ka.ī din se

shahīd-e-ishq kī ye maut hai yā zindagī yārab

nahīñ ma.alūm kyuuñ bajtī hai shahnā.ī ka.ī din se

qayāmat se nahīñ kam furqat-e-ahbāb kā ġham bhī

dil-e-muztar ko rotī hai shakebā.ī ka.ī din se

nazar meñ tishnagī lab par duā.eñ dil meñ ummīdeñ

haram ke gard phirtā hai tamannā.ī ka.ī din se

dil-e-bīmār se kyā kah diyā un kī nigāhoñ ne

kuchh ab mahsūs hotī hai tavānā.ī ka.ī din se

kisī ahl-e-nazar kī phir unheñ shāyad zarūrat hai

ki phir betāb hai shauq-e-ḳhud-ārā.ī ka.ī din se

suneñ arbāb-e-mahfil gosh-e-dil se dil kī āvāzeñ

ki 'zauqī' kar rahā hai naġhma-pairā.ī ka.ī din se

ajab be-kaif hai raaton ki tanhai kai din se

kisi ki yaad bhi dil mein nahin aai kai din se

bahut maghmum hai shan-e-masihai kai din se

baDhi jati hai zaKHm-e-dil ki gahrai kai din se

kali ne bhi uDaya tha mazaq-e-girya-e-shabnam

paDi hai KHak par KHushk aur murjhai kai din se

chura lai hai shayad nikhat-e-gul sehn-e-gulshan se

nasim-e-subh kyun phirti hai ghabrai kai din se

KHuda jaane ye ab kya ho gaya hum bad-nasibon ko

ki tere gham ki lazzat bhi na ras aai kai din se

idhar bhi ek nazar ai malik-e-virana-o-gulshan

tere kuche mein phirta hai ye saudai kai din se

shahid-e-ishq ki ye maut hai ya zindagi yarab

nahin malum kyun bajti hai shahnai kai din se

qayamat se nahin kam furqat-e-ahbab ka gham bhi

dil-e-muztar ko roti hai shakebai kai din se

nazar mein tishnagi lab par duaen dil mein ummiden

haram ke gard phirta hai tamannai kai din se

dil-e-bimar se kya kah diya un ki nigahon ne

kuchh ab mahsus hoti hai tawanai kai din se

kisi ahl-e-nazar ki phir unhen shayad zarurat hai

ki phir betab hai shauq-e-KHud-arai kai din se

sunen arbab-e-mahfil gosh-e-dil se dil ki aawazen

ki 'zauqi' kar raha hai naghma-pairai kai din se