ajab faqir ho taj-e-jahaniyan tum ho

ajab faqīr ho tāj-e-jahāniyāñ tum ho

hasīr-e-ḳhāk pe masjūd āsmāñ tum ho

hujūm-e-nūr meñ khoyā huā hai merā vajūd

sivā-e-rūh vahāñ kyā huuñ maiñ jahāñ tum ho

darūñ-nigāh ko tanhā-ravī kā vahm nahīñ

varā-e-parda to sarḳhīl-e-kārvāñ tum ho

hijāb māne-e-ashkāl-e-ḳhīrgī Thahrā

nihāñ hue ho to kuchh aur bhī ayaañ tum ho

junūñ hazār zabāñ hai magar kise ma.alūm

ki jauhar-suḳhan-o-hāsil-bayāñ tum ho

kabhī balā kā tahayyur kahāñ nahīñ ho tum

kabhī tajassus-e-zohra-shikan kahāñ tum ho

yahī kushinda-a-ā.ada yahī hai bāz-pasīñ

tumhārā nāvak-e-sar-tez maiñ kamāñ tum ho

mujhe tumheñ nazar aate ho aur koī nahīñ

mire liye sabhī mahjūb haiñ ayaañ tum ho

mirī nigāh meñ āfāq-e-rañg-o-bū lāshe

mirī zamīn vo hai jis kā āsmāñ tum ho

pas-az-hayāt bhī haiñ kitnī vādiyāñ baaqī

abhī jahāñ ko ḳhabar kyā kahāñ kahāñ tum ho

hameñ tumhārī aTariyā kī chhāñv kaafī hai

sabhī ke sab haiñ hamāre to bas miyāñ tum ho

tumheñ sunā.ūñ jo yaad aa.e mujh pe kyā guzrī

ki dāstāñ to mirī mere dostāñ tum ho

ilāj-e-pastī-e-imroz laao tab jāneñ

amīn-e-rif.at-e-advār-e-pāstāñ tum ho

tumheñ gila thā ki ik nasl-e-ḳhvāb-nāk the ham

so lo ki ham to chale kal ke pāsbāñ tum ho

na pūchhe koī to yuuñ apne dil ko phuslā lo

durafsh-e-lashkar-e-fardā to be-gumāñ tum ho

ajab faqir ho taj-e-jahaniyan tum ho

hasir-e-KHak pe masjud aasman tum ho

hujum-e-nur mein khoya hua hai mera wajud

siwa-e-ruh wahan kya hun main jahan tum ho

darun-nigah ko tanha-rawi ka wahm nahin

wara-e-parda to sarKHil-e-karwan tum ho

hijab mane-e-ashkal-e-KHirgi Thahra

nihan hue ho to kuchh aur bhi ayan tum ho

junun hazar zaban hai magar kise malum

ki jauhar-suKHan-o-hasil-bayan tum ho

kabhi bala ka tahayyur kahan nahin ho tum

kabhi tajassus-e-zohra-shikan kahan tum ho

yahi kushinda-a-aada yahi hai baz-pasin

tumhaara nawak-e-sar-tez main kaman tum ho

mujhe tumhein nazar aate ho aur koi nahin

mere liye sabhi mahjub hain ayan tum ho

meri nigah mein aafaq-e-rang-o-bu lashe

meri zamin wo hai jis ka aasman tum ho

pas-az-hayat bhi hain kitni wadiyan baqi

abhi jahan ko KHabar kya kahan kahan tum ho

hamein tumhaari aTariya ki chhanw kafi hai

sabhi ke sab hain hamare to bas miyan tum ho

tumhein sunaun jo yaad aae mujh pe kya guzri

ki dastan to meri mere dostan tum ho

ilaj-e-pasti-e-imroz lao tab jaanen

amin-e-rifat-e-adwar-e-pastan tum ho

tumhein gila tha ki ek nasl-e-KHwab-nak the hum

so lo ki hum to chale kal ke pasban tum ho

na puchhe koi to yun apne dil ko phusla lo

durafsh-e-lashkar-e-farda to be-guman tum ho