ajab fasurda-dili se hayat kaTi hai

ajab fasurda-dilī se hayāt kaaTī hai

qarīb baiTh ke mayyat ke raat kaaTī hai

kisī kī yaad kī zanjīr TūTtī hī na thī

ye qaid-e-umr ba-sad-mushkilāt kaaTī hai

habāb-dār huā ḳhud-numā jahāñ qatra

sazā-e-da.avā-e-irfān-e-zāt kaaTī hai

uruuj ḳhāk-nashīnoñ kā bhī are tauba

tanāb-e-ḳhema-e-gardūñ-sifāt kaaTī hai

vo ḳhār-zār-e-hayāt aur ye ābla-pā.ī

lahū jalā ke shab-e-sānehāt kaaTī hai

huā hai yuuñ bhī ki jhuk jhuk ke jaḌ mohabbat kī

rafīqoñ ne za-rah-e-iltifāt kaaTī hai

kahīñ na 'barq' kī mahrūmiyoñ kā zikr aa.e

adū ne ishq-o-mohabbat kī baat kaaTī hai

ajab fasurda-dili se hayat kaTi hai

qarib baiTh ke mayyat ke raat kaTi hai

kisi ki yaad ki zanjir TuTti hi na thi

ye qaid-e-umr ba-sad-mushkilat kaTi hai

habab-dar hua KHud-numa jahan qatra

saza-e-dawa-e-irfan-e-zat kaTi hai

uruj KHak-nashinon ka bhi are tauba

tanab-e-KHema-e-gardun-sifat kaTi hai

wo KHar-zar-e-hayat aur ye aabla-pai

lahu jala ke shab-e-sanehat kaTi hai

hua hai yun bhi ki jhuk jhuk ke jaD mohabbat ki

rafiqon ne za-rah-e-iltifat kaTi hai

kahin na 'barq' ki mahrumiyon ka zikr aae

adu ne ishq-o-mohabbat ki baat kaTi hai