ajab hai mehr se us shoKH ki visal ka waqt

ajab hai 'mehr' se us shoḳh kī visāl kā vaqt

vo dopahar ki jo maḳhsūs hai zavāl kā vaqt

mirī to ḳhaak bhī tere qadam na chhoḌegī

zarā tū aane to de apne pā.emāl kā vaqt

chaman kī sair hai bulbul paḌe chahaktī haiñ

hamāre aap ke bhī hai ye bol-chāl kā vaqt

karo na zikr raqīboñ kā mujh se raag na laao

ḳhatā muaaf nahīñ hai ye us ḳhayāl kā vaqt

ab un kī chaal qayāmat hai kyuuñ na dil pis jaa.e

abhī guzar gayā kabk-e-darī kī chaal kā vaqt

masal hai aañkh bachī maal dostoñ kā huā

zamāna daulat-e-duniyā kā hai ḳhayāl kā vaqt

kahāñ ye nok-palak phir kahāñ ye husn-e-shabāb

idhar ko dekho yahī to hai dekh-bhāl kā vaqt

duā.eñ deñge unheñ ye faqīr kambal-posh

ilāhī duur do-shāle kā hove shaal kā vaqt

ajab hai 'mehr' se us shoKH ki visal ka waqt

wo dopahar ki jo maKHsus hai zawal ka waqt

meri to KHak bhi tere qadam na chhoDegi

zara tu aane to de apne paemal ka waqt

chaman ki sair hai bulbul paDe chahakti hain

hamare aap ke bhi hai ye bol-chaal ka waqt

karo na zikr raqibon ka mujh se rag na lao

KHata muaf nahin hai ye us KHayal ka waqt

ab un ki chaal qayamat hai kyun na dil pis jae

abhi guzar gaya kabk-e-dari ki chaal ka waqt

masal hai aankh bachi mal doston ka hua

zamana daulat-e-duniya ka hai KHayal ka waqt

kahan ye nok-palak phir kahan ye husn-e-shabab

idhar ko dekho yahi to hai dekh-bhaal ka waqt

duaen denge unhen ye faqir kambal-posh

ilahi dur do-shaale ka howe shaal ka waqt