ajab hain hum ye kis ki sai-e-la-hasil pe rote hain

ajab haiñ ham ye kis kī sa.i-e-lā-hāsil pe rote haiñ

abhī zinda haiñ aur nākāmī-e-qātil pe rote haiñ

hameñ rah rah ke tūfāñ kī rifāqat yaad aatī hai

haiñ ab āsūda-e-sāhil khaḌe sāhil pe rote haiñ

bahut ham ko rulāyā māzī-o-imroz ne so ab

nashāt-e-girya aisā hai ki mustaqbil pe rote haiñ

giroh-e-āshiqāñ thā shahr-e-girya un kī manzil thī

ye raste bhar bhī rote aa.e ab manzil pe rote haiñ

kahāñ rote haiñ ham āġhāz-e-tansīḳh-e-ta.alluq par

jo khīñchī jā chukī hai us had-e-fāsil pe rote haiñ

ajab hain hum ye kis ki sai-e-la-hasil pe rote hain

abhi zinda hain aur nakaami-e-qatil pe rote hain

hamein rah rah ke tufan ki rifaqat yaad aati hai

hain ab aasuda-e-sahil khaDe sahil pe rote hain

bahut hum ko rulaya mazi-o-imroz ne so ab

nashat-e-girya aisa hai ki mustaqbil pe rote hain

giroh-e-ashiqan tha shahr-e-girya un ki manzil thi

ye raste bhar bhi rote aae ab manzil pe rote hain

kahan rote hain hum aaghaz-e-tansiKH-e-talluq par

jo khinchi ja chuki hai us had-e-fasil pe rote hain