ajab hi haal tha aawaz ka to

ajab hī haal thā āvāz kā to

ye mar jaatī agar maiñ boltā to

mirā saaya nahīñ baḌhtā hai aage

ye kahtā hai agar maiñ gir gayā to

maiñ jaisā thā mirī tasvīr meñ kal

tumheñ vaisā agar maiñ na milā to

tumhāre tabsire se tañg aa kar

hamāre haal ne kuchh kar liyā to

dabā kar to rakhūñgā raaz tere

mujhe phir bhī kisī ne paḌh liyā to

tumheñ bechainiyāñ hī maar deñgī

agar maiñ hañs ke thoḌā mil liyā to

nahīñ rah pāoge phir tum vahāñ par

kaleja kaaT kar kuchh likh diyā to

miTā doge mujhe tum jāntā huuñ

magar socho agar maiñ bach gayā to

nikal paḌte ho tum yuuñ saj-sañvar ke

kabhī sochā mujhe kuchh ho gayā to

ba-zāhir jañg hogī hādsoñ kī

agar maiñ beach meñ se haT gayā to

ajab hi haal tha aawaz ka to

ye mar jati agar main bolta to

mera saya nahin baDhta hai aage

ye kahta hai agar main gir gaya to

main jaisa tha meri taswir mein kal

tumhein waisa agar main na mila to

tumhaare tabsire se tang aa kar

hamare haal ne kuchh kar liya to

daba kar to rakhunga raaz tere

mujhe phir bhi kisi ne paDh liya to

tumhein bechainiyan hi mar dengi

agar main hans ke thoDa mil liya to

nahin rah paoge phir tum wahan par

kaleja kaT kar kuchh likh diya to

miTa doge mujhe tum jaanta hun

magar socho agar main bach gaya to

nikal paDte ho tum yun saj-sanwar ke

kabhi socha mujhe kuchh ho gaya to

ba-zahir jang hogi hadson ki

agar main beach mein se haT gaya to