ajab ek waqt gulshan mein ye paigham-e-bahaar aaya

ajab ik vaqt gulshan meñ ye paiġhām-e-bahār aayā

fazā hī sāzgār aa.ī na mausam sāzgār aayā

sunā.ūñ kyā maiñ apnī dāstān-e-ġham tujhe hamdam

vo aayā apnī mahfil meñ magar begāna-vār aayā

tabassum ne kisī ke ruuh phūñkī gulsitānoñ meñ

shagūfoñ ko javānī kā yaqīn-o-e'tibār aayā

usī ko log kahte haiñ surūr-o-kaif kā aalam

surāhī ḳhatm ho jaane pe halkā sā ḳhumār aayā

ajab ik mahviyat thī log dīvāna samajhte the

tire kūche meñ kuchh din is tarah maiñ bhī guzār aayā

karo ai ham-safīro ehtimām-e-jashn-e-āzādī

ḳhizāñ ruḳhsat huī lo jhuum kar abr-e-bahār aayā

'nazar' ne ḳhud bhī dekhā hai jamāl-e-yār kā aalam

jo un ke rū-ba-rū pahuñchā vahī kuchh be-qarār aayā

ajab ek waqt gulshan mein ye paigham-e-bahaar aaya

faza hi sazgar aai na mausam sazgar aaya

sunaun kya main apni dastan-e-gham tujhe hamdam

wo aaya apni mahfil mein magar begana-war aaya

tabassum ne kisi ke ruh phunki gulsitanon mein

shagufon ko jawani ka yaqin-o-e'tibar aaya

usi ko log kahte hain surur-o-kaif ka aalam

surahi KHatm ho jaane pe halka sa KHumar aaya

ajab ek mahwiyat thi log diwana samajhte the

tere kuche mein kuchh din is tarah main bhi guzar aaya

karo ai ham-safiro ehtimam-e-jashn-e-azadi

KHizan ruKHsat hui lo jhum kar abr-e-bahaar aaya

'nazar' ne KHud bhi dekha hai jamal-e-yar ka aalam

jo un ke ru-ba-ru pahuncha wahi kuchh be-qarar aaya