ajab kashish hai pas-e-ism-e-zat chalti hui

ajab kashish hai pas-e-ism-e-zāt chaltī huī

tavīl sajde meñ hai kā.enāt chaltī huī

milī thī raah meñ ik be-qarār parchhā.īñ

ghar aa ga.ī hai mire saath saath chaltī huī

tulū-e-sub.h se pahle ġhurūb-e-shām ke baad

Thahar ga.ī mire siine meñ raat chaltī huī

so maiñ ne bahs na kī guftugū ko ḳhatm kiyā

nikal ga.ī thī bahut duur baat chaltī huī

bichhaḌ gayā thā vahīñ vaqt saath chaltā huā

bhaTak ga.ī thī jahāñ kā.enāt chaltī huī

kuchh is tarah se sadā dī hai ik nazar ne 'nabīl'

ThiThak ke ruk ga.ī jaise hayāt chaltī huī

ajab kashish hai pas-e-ism-e-zat chalti hui

tawil sajde mein hai kaenat chalti hui

mili thi rah mein ek be-qarar parchhain

ghar aa gai hai mere sath sath chalti hui

tulu-e-subh se pahle ghurub-e-sham ke baad

Thahar gai mere sine mein raat chalti hui

so main ne bahs na ki guftugu ko KHatm kiya

nikal gai thi bahut dur baat chalti hui

bichhaD gaya tha wahin waqt sath chalta hua

bhaTak gai thi jahan kaenat chalti hui

kuchh is tarah se sada di hai ek nazar ne 'nabil'

ThiThak ke ruk gai jaise hayat chalti hui