ajab mamul hai aawargi ka

ajab ma.amūl hai āvārgī kā

garebāñ jhāñktī hai har galī kā

na jaane kis tarah kaise ḳhudā ne

bharosa kar liyā thā aadmī kā

abhī is vaqt hai jo kuchh hai varna

koī lamha nahīñ maujūdgī kā

mujhe tum se bichhaḌne ke evaz meñ

vasīla mil gayā hai shā.irī kā

zamīñ hai raqs meñ sūraj kī jānib

chhupā kar jism aadhā tīrgī kā

maiñ ik hī sat.h par Thahrūñgā kaise

utartā chaḌhtā paanī huuñ nadī kā

maiñ miTTī gūñdh kar ye sochtā huuñ

mujhe fan aa gayā kūza-garī kā

khaTak jā.ūñgā sofe ko tumhāre

maiñ banda baiThne vaalā darī kā

maiñ us manzar meñ paayā hī gayā kab

jahāñ bhī zāviya niklā ḳhushī kā

samundar jis kī āñkhoñ kā ho ḳhālī

vo kaise ḳhvāb dekhe jal-parī kā

nikālo kiil ko dīvār meñ se

vagarna Taañg lo photo kisī kā

ajab mamul hai aawargi ka

gareban jhankti hai har gali ka

na jaane kis tarah kaise KHuda ne

bharosa kar liya tha aadmi ka

abhi is waqt hai jo kuchh hai warna

koi lamha nahin maujudgi ka

mujhe tum se bichhaDne ke ewaz mein

wasila mil gaya hai shairi ka

zamin hai raqs mein suraj ki jaanib

chhupa kar jism aadha tirgi ka

main ek hi sath par Thahrunga kaise

utarta chaDhta pani hun nadi ka

main miTTi gundh kar ye sochta hun

mujhe fan aa gaya kuza-gari ka

khaTak jaunga sofe ko tumhaare

main banda baiThne wala dari ka

main us manzar mein paya hi gaya kab

jahan bhi zawiya nikla KHushi ka

samundar jis ki aankhon ka ho KHali

wo kaise KHwab dekhe jal-pari ka

nikalo kil ko diwar mein se

wagarna Tang lo photo kisi ka