ajab sauda-e-wahshat hai dil-e-KHud-sar mein rahta hai

ajab saudā-e-vahshat hai dil-e-ḳhud-sar meñ rahtā hai

ye kaisī chhab kā mālik hai ye kaise ghar meñ rahtā hai

usī ke dam-qadam se hai jahān-e-dīda-o-nazzārā

kahīñ āñkhoñ meñ bastā hai kahīñ manzar meñ rahtā hai

nihāl-e-ḳhushk meñ ab tak vo sūkhā zard sā pattā

barahna lagtā hai lekin libās-e-zar meñ rahtā hai

mirī āñkhoñ se le kar tere chehre tak sitāre haiñ

ki jo gardish meñ aa jaa.e usī mehvar meñ rahtā hai

maiñ apne aks ko ram-ḳhurdagī se baaz kyā rakkhūñ

ġhazāl-e-ā.ina-ḳhāna kisī ke Dar meñ rahtā hai

mujhe to gor-e-girya meñ sulā dete haiñ ghar vaale

magar ehsās-e-bedārī mire bistar meñ rahtā hai

ajab sauda-e-wahshat hai dil-e-KHud-sar mein rahta hai

ye kaisi chhab ka malik hai ye kaise ghar mein rahta hai

usi ke dam-qadam se hai jahan-e-dida-o-nazzara

kahin aankhon mein basta hai kahin manzar mein rahta hai

nihaal-e-KHushk mein ab tak wo sukha zard sa patta

barahna lagta hai lekin libas-e-zar mein rahta hai

meri aankhon se le kar tere chehre tak sitare hain

ki jo gardish mein aa jae usi mehwar mein rahta hai

main apne aks ko ram-KHurdagi se baz kya rakkhun

ghazal-e-aina-KHana kisi ke Dar mein rahta hai

mujhe to gor-e-girya mein sula dete hain ghar wale

magar ehsas-e-bedari mere bistar mein rahta hai