ajab si baat nahin kah gaya madari kya

'ajab sī baat nahīñ kah gayā madārī kyā

'adan se nikle hue saañp ko piTārī kyā

vo apnā kāñdhā baḌhā.e to yaad aatā hai

udhār māñgī huī niiñd kyā ḳhumārī kyā

vahāñ sadā.eñ musalsal duhā.ī detī haiñ

yahāñ kisī ko zarūrat nahīñ hamārī kyā

zamāna suntā hai ruk kar hamārī bātoñ ko

hamāre siine meñ āvāz hai tumhārī kiyā

mirā paḌāv ziyāda nahīñ zamāne meñ

mirī balā se ye hotī hai duniyā-dārī kyā

sunā hai tum bhī satā.e hue ho apnoñ ke

tumhāre vāste aa.ī nahīñ savārī kyā

tamām shahr meñ chīḳheñ sunā.ī detī haiñ

kisī ke haath yuuñ ḳhanjar bane kaTārī kyā

'adīm' raat kī dīvār kā sahārā liye

isī tarah se guzāroge 'umr saarī kyā

'ajab si baat nahin kah gaya madari kya

'adan se nikle hue sanp ko piTari kya

wo apna kandha baDhae to yaad aata hai

udhaar mangi hui nind kya KHumari kya

wahan sadaen musalsal duhai deti hain

yahan kisi ko zarurat nahin hamari kya

zamana sunta hai ruk kar hamari baaton ko

hamare sine mein aawaz hai tumhaari kiya

mera paDaw ziyaada nahin zamane mein

meri bala se ye hoti hai duniya-dari kya

suna hai tum bhi satae hue ho apnon ke

tumhaare waste aai nahin sawari kya

tamam shahr mein chiKHen sunai deti hain

kisi ke hath yun KHanjar bane kaTari kya

'adim' raat ki diwar ka sahaara liye

isi tarah se guzaroge 'umr sari kya