ajab sitam hai ki tere hisse se ghaT raha hun

ajab sitam hai ki tere hisse se ghaT rahā huuñ

maiñ terā ho kar bhī aur logoñ meñ baT rahā huuñ

tū ek sail-e-ravāñ kī sūrat guzar rahā hai

maiñ ik jazīra huuñ har kināre se kaT rahā huuñ

khuleñge asrār-e-ishq uzlat-nashīniyoñ meñ

maiñ ek duniyā se ek dil meñ simaT rahā huuñ

agar tujhe ishq taash kā khel lag rahā hai

to le maiñ apne tamām patte ulaT rahā huuñ

azal abad ke sabhī masā.il pe baat hogī

abhī to ai zindagī maiñ tujh se nimaT rahā huuñ

sitāre juuñ juuñ falak se ma.adūm ho rahe haiñ

mujhe ye lagtā hai meñ bhī manzar se haT rahā huuñ

ajab sitam hai ki tere hisse se ghaT raha hun

main tera ho kar bhi aur logon mein baT raha hun

tu ek sail-e-rawan ki surat guzar raha hai

main ek jazira hun har kinare se kaT raha hun

khulenge asrar-e-ishq uzlat-nashiniyon mein

main ek duniya se ek dil mein simaT raha hun

agar tujhe ishq tash ka khel lag raha hai

to le main apne tamam patte ulaT raha hun

azal abad ke sabhi masail pe baat hogi

abhi to ai zindagi main tujh se nimaT raha hun

sitare jun jun falak se madum ho rahe hain

mujhe ye lagta hai mein bhi manzar se haT raha hun