ajab sukut sa tari hai dil ke KHanon mein

ajab sukūt sā taarī hai dil ke ḳhānoñ meñ

ki dhaḌkaneñ bhī mirī gūñjtī haiñ kānoñ meñ

zarā sī tīrgī dekheñ jo āsmānoñ meñ

tuyūr lauTne lagte haiñ āshiyānoñ meñ

ik ek kar ke sabhī kuuch karte jaate haiñ

koī paret hai kyā shahr ke makānoñ meñ

vo jin meñ dekhne se dil kā haal dikh jaa.e

koī vo aa.ine rakh de nigār ḳhānoñ meñ

darūn-e-dil jo tirī yaad ke dafīne haiñ

bahut se qīmtī motī haiñ in ḳhazānoñ meñ

suḳhan ke shahr meñ kuchh bhī nayā nahīñ aayā

purānā maal hī biktā hai sab dukānoñ meñ

kisī bhī haal meñ us ko manā ke le aa.uuñ

palaT sakūñ jo maiñ guzre hue zamānoñ meñ

gulāb suukh ke shāḳhoñ se jhaḌ ga.e kab ke

ye chand ḳhaar hī baaqī haiñ phūl-dānoñ meñ

kabhī jo pyaar mohabbat kī baat niklegī

hamārā naam bhī aa.egā dāstānoñ meñ

vo jis meñ jaan se baḌh kar thī yaar kī izzat

'zakī' vo āshiqī miltī hai ab fasānoñ meñ

ajab sukut sa tari hai dil ke KHanon mein

ki dhaDkanen bhi meri gunjti hain kanon mein

zara si tirgi dekhen jo aasmanon mein

tuyur lauTne lagte hain aashiyanon mein

ek ek kar ke sabhi kuch karte jate hain

koi paret hai kya shahr ke makanon mein

wo jin mein dekhne se dil ka haal dikh jae

koi wo aaine rakh de nigar KHanon mein

darun-e-dil jo teri yaad ke dafine hain

bahut se qimti moti hain in KHazanon mein

suKHan ke shahr mein kuchh bhi naya nahin aaya

purana mal hi bikta hai sab dukanon mein

kisi bhi haal mein us ko mana ke le aaun

palaT sakun jo main guzre hue zamanon mein

gulab sukh ke shaKHon se jhaD gae kab ke

ye chand KHar hi baqi hain phul-danon mein

kabhi jo pyar mohabbat ki baat niklegi

hamara nam bhi aaega dastanon mein

wo jis mein jaan se baDh kar thi yar ki izzat

'zaki' wo aashiqi milti hai ab fasanon mein