عجب تضاد ہے سچائیوں سے آگے بھی

عجب تضاد ہے سچائیوں سے آگے بھی

مرا وجود ہے پرچھائیوں سے آگے بھی

کسی کا حسن فریب‌ نشاط دیتا ہے

نگار وقت کی انگڑائیوں سے آگے بھی

چلا ہے تلخ حقائق کا کارواں جیسے

مرے یقین کی بینائیوں سے آگے بھی

جہاں وجود بھی خود کو سمیٹ لیتا ہے

وہ اک مقام ہے تنہائیوں سے آگے بھی

نہ جانے کیوں مجھے احساس یہ ستاتا ہے

کہ کوئی اور ہے پرچھائیوں سے آگے بھی

کوئی سفر میں ہے آصفؔ مرے علاوہ بھی

مرے وجود کی سچائیوں سے آگے بھی