ajab tazad hai sachchaiyon se aage bhi

ajab tazād hai sachchā.iyoñ se aage bhī

mirā vajūd hai parchhā.iyoñ se aage bhī

kisī kā husn fareb-e-nashāt detā hai

nigār-e-vaqt kī añgḌā.iyoñ se aage bhī

chalā hai talḳh haqā.eq kā kārvāñ jaise

mire yaqīn kī bīnā.iyoñ se aage bhī

jahāñ vajūd bhī ḳhud ko sameT letā hai

vo ik maqām hai tanhā.iyoñ se aage bhī

na jaane kyoñ mujhe ehsās ye satātā hai

ki koī aur hai parchhā.iyoñ se aage bhī

koī safar meñ hai 'āsif' mire alāva bhī

mire vajūd kī sachchā.iyoñ se aage bhī

ajab tazad hai sachchaiyon se aage bhi

mera wajud hai parchhaiyon se aage bhi

kisi ka husn fareb-e-nashat deta hai

nigar-e-waqt ki angDaiyon se aage bhi

chala hai talKH haqaeq ka karwan jaise

mere yaqin ki binaiyon se aage bhi

jahan wajud bhi KHud ko sameT leta hai

wo ek maqam hai tanhaiyon se aage bhi

na jaane kyon mujhe ehsas ye satata hai

ki koi aur hai parchhaiyon se aage bhi

koi safar mein hai 'asif' mere alawa bhi

mere wajud ki sachchaiyon se aage bhi