عجب تیر نگہ میں کچھ اثر ہے

عجب تیر نگہ میں کچھ اثر ہے

نہ بر میں دل نہ سینے میں جگر ہے

مآل عاشقی کیا پوچھتے ہو

جگر کے پار ہر تیر نظر ہے

وہ جیسی صبح ویسی ہی شب ہجر

غضب کی رات آفت کی سحر ہے

قفس چھوڑا عجب صورت سے ہم نے

نہ بازو ہے نہ گردن ہے نہ سر ہے

تمہیں کیا ہم پہ جو گزری سو گزری

حساب اے جاں ہمارا حشر پر ہے

لگی لو شمع ساں اک شعلہ رو کی

بلا سے سر کٹے اب کس کو ڈر ہے

غرض مطلق نہیں مجھ کو کسی سے

نسیمؔ اپنی خدا ہی پر نظر ہے