ajab tir-e-nigah mein kuchh asar hai

ajab tīr-e-nigah meñ kuchh asar hai

na bar meñ dil na siine meñ jigar hai

ma.āl-e-āshiqī kyā pūchhte ho

jigar ke paar har tīr-e-nazar hai

vo jaisī sub.h vaisī hī shab-e-hijr

ġhazab kī raat aafat kī sahar hai

qafas chhoḌā ajab sūrat se ham ne

na baazū hai na gardan hai na sar hai

tumheñ kyā ham pe jo guzrī so guzrī

hisāb ai jaañ hamārā hashr par hai

lagī lau sham.a-sāñ ik sho.ala-rū kī

balā se sar kaTe ab kis ko Dar hai

ġharaz mutlaq nahīñ mujh ko kisī se

'nasīm' apnī ḳhudā hī par nazar hai

ajab tir-e-nigah mein kuchh asar hai

na bar mein dil na sine mein jigar hai

maal-e-ashiqi kya puchhte ho

jigar ke par har tir-e-nazar hai

wo jaisi subh waisi hi shab-e-hijr

ghazab ki raat aafat ki sahar hai

qafas chhoDa ajab surat se hum ne

na bazu hai na gardan hai na sar hai

tumhein kya hum pe jo guzri so guzri

hisab ai jaan hamara hashr par hai

lagi lau shama-san ek shoala-ru ki

bala se sar kaTe ab kis ko Dar hai

gharaz mutlaq nahin mujh ko kisi se

'nasim' apni KHuda hi par nazar hai