ajal ne kar diya KHamosh to kya hai zaban hun main

ajal ne kar diyā ḳhāmosh to kyā hai zabāñ huuñ maiñ

ki hastī kā fasāna huuñ adam kī dāstāñ huuñ maiñ

zamīñ vaale jo kahte haiñ ki ab kyā piis Dālegā

to miltā hai javāb is kā ki daur-e-āsmāñ huuñ maiñ

maiñ samjhātā huuñ jab dil ko to kahtā hai matānat se

zamāne kī zabāñ to hai haqīqat kī zabāñ huuñ maiñ

mirī tasvīr merā but mirā marqad hai tan merā

kabhī thā to isī duniyā meñ lekin ab kahāñ huuñ maiñ

tirī ġhairat ko ai nāz-e-sitamgar kyā huā āḳhir

tire hote hue mamnūn-e-jaur-e-āsmāñ huuñ meñ

qayāmat kar gayā bār-e-amānat kā uThā lenā

harīf-e-mā-sivā huuñ mubtalā-e-imtihāñ huuñ maiñ

na jab uTThā thā dil duniyā se zarra zarra dilkash thā

magar ab āshiyāñ har jā hai par be āshiyāñ huuñ maiñ

nazar aatā hai har mimbar pe mujh ko ik nayā vaa.iz

jahāñ rindoñ kā majma.a ho vahāñ pīr-e-muġhāñ huuñ maiñ

mirī qismat meñ ai 'beḳhud' kahāñ manzil kī āsā.ish

ġhubār-e-rāh huuñ bāñg-e-darā-e-kārvāñ huuñ maiñ

ajal ne kar diya KHamosh to kya hai zaban hun main

ki hasti ka fasana hun adam ki dastan hun main

zamin wale jo kahte hain ki ab kya pis Dalega

to milta hai jawab is ka ki daur-e-asman hun main

main samjhata hun jab dil ko to kahta hai matanat se

zamane ki zaban to hai haqiqat ki zaban hun main

meri taswir mera but mera marqad hai tan mera

kabhi tha to isi duniya mein lekin ab kahan hun main

teri ghairat ko ai naz-e-sitamgar kya hua aaKHir

tere hote hue mamnun-e-jaur-e-asman hun mein

qayamat kar gaya bar-e-amanat ka uTha lena

harif-e-ma-siwa hun mubtala-e-imtihan hun main

na jab uTTha tha dil duniya se zarra zarra dilkash tha

magar ab aashiyan har ja hai par be aashiyan hun main

nazar aata hai har mimbar pe mujh ko ek naya waiz

jahan rindon ka majma ho wahan pir-e-mughan hun main

meri qismat mein ai 'beKHud' kahan manzil ki aasaish

ghubar-e-rah hun bang-e-dara-e-karwan hun main