اجل نے لوٹ لیا آ کے کاروان حیات

اجل نے لوٹ لیا آ کے کاروان حیات

سنا رہا ہوں زمانہ کو داستان حیات

ہزاروں کروٹیں بدلیں زمانہ نے لیکن

اٹھے نہ خواب تغافل سے خفتگان حیات

رہا نہ پیری میں جب کچھ بھی زندگی کا مزہ

سحر کے وقت چلے اٹھ کے مہمان حیات

رہ عدم کی وہ دشواریاں معاذ اللہ

کہ مر کے پہنچے ہیں منزل پہ رہروان حیات

بہار جلوہ گہہ یار تیرا کیا کہنا

عدم سے آئے ہیں ہستی میں طالبان حیات

یہی بلندی و پستی ہے بس زمانہ کی

ہے اک زمین حیات ایک آسمان حیات

کسی طرح بھی تلافیٔ زیست ہو نہ سکی

قضا کے سر پہ رہا خون کشتگان حیات

کھلا نہ غنچۂ دل باغ دہر میں افقرؔ

خزاں نصیب رہا اپنا گلستان حیات