ajib haalat hai jism-o-jaan ki hazar pahlu badal raha hun

ajiib hālat hai jism-o-jāñ kī hazār pahlū badal rahā huuñ

vo mere andar utar gayā hai maiñ ḳhud se bāhar nikal rahā huuñ

bahut se logoñ meñ paañv ho kar bhī chalne-phirne kā dam nahīñ hai

mire ḳhudā kā karam hai mujh par maiñ apne pairoñ se chal rahā huuñ

maiñ kitne ash.ār likh ke kāġhaz pe phaaḌ detā huuñ be-ḳhudī meñ

mujhe pata hai maiñ azhdahā ban ke apne bachche nigal rahā huuñ

vo tez āñdhī jo gard uḌātī huī ga.ī hai tabhī se yaaro

galī ke nukkaḌ pe baiThā baiThā maiñ apnī āñkheñ masal rahā huuñ

abhī to āġhāz hai safar kā abhī añdhere bahut mileñge

tum apnī sham.eñ bachā ke rakkho charāġh ban kar maiñ jal rahā huuñ

ajib haalat hai jism-o-jaan ki hazar pahlu badal raha hun

wo mere andar utar gaya hai main KHud se bahar nikal raha hun

bahut se logon mein panw ho kar bhi chalne-phirne ka dam nahin hai

mere KHuda ka karam hai mujh par main apne pairon se chal raha hun

main kitne ashaar likh ke kaghaz pe phaD deta hun be-KHudi mein

mujhe pata hai main azhdaha ban ke apne bachche nigal raha hun

wo tez aandhi jo gard uDati hui gai hai tabhi se yaro

gali ke nukkaD pe baiTha baiTha main apni aankhen masal raha hun

abhi to aaghaz hai safar ka abhi andhere bahut milenge

tum apni shamen bacha ke rakkho charagh ban kar main jal raha hun