ajib KHwahish hai shahr walon se chhup chhupa kar kitab likkhun

ajiib ḳhvāhish hai shahr vāloñ se chhup chhupā kar kitāb likkhūñ

tumhāre naam apnī zindagī kī kitāb kā intisāb likkhūñ

vo lamha kitnā ajiib thā jab hamārī āñkheñ gale milī thiiñ

maiñ kis tarah ab mohabbatoñ kī shikastagī ke azaab likkhūñ

tumhī ne mere ujaaḌ rastoñ pe ḳhvāhishoñ ke diye jalā.e

tumhī ne chāhā thā ḳhushk hoñToñ se chāhatoñ ke gulāb likkhūñ

kabhī vo din the ki niiñd āñkhoñ kī sarhadoñ se pare pare thī

magar maiñ ab jab bhī sonā chāhūñ tumhārī yādoñ ke ḳhvāb likkhūñ

maiñ tanhā laḌkī dayār-e-shab meñ jalā.ūñ sach ke diye kahāñ tak

siyāhkāroñ kī saltanat meñ maiñ kis tarah āftāb likkhūñ

qayādatoñ ke junūñ meñ jin ke qadam lahū se rañge hue haiñ

ye mere bas meñ nahīñ hai logo ki un ko izzat-ma.āb likkhūñ

yahī bahut hai ki in laboñ ko sadā se mahrūm kar ke rakh duuñ

magar ye kaisī musālahat hai samundaroñ ko sarāb likkhūñ

ajib KHwahish hai shahr walon se chhup chhupa kar kitab likkhun

tumhaare nam apni zindagi ki kitab ka intisab likkhun

wo lamha kitna ajib tha jab hamari aankhen gale mili thin

main kis tarah ab mohabbaton ki shikastagi ke azab likkhun

tumhi ne mere ujaD raston pe KHwahishon ke diye jalae

tumhi ne chaha tha KHushk honTon se chahaton ke gulab likkhun

kabhi wo din the ki nind aankhon ki sarhadon se pare pare thi

magar main ab jab bhi sona chahun tumhaari yaadon ke KHwab likkhun

main tanha laDki dayar-e-shab mein jalaun sach ke diye kahan tak

siyahkaron ki saltanat mein main kis tarah aaftab likkhun

qayaadaton ke junun mein jin ke qadam lahu se range hue hain

ye mere bas mein nahin hai logo ki un ko izzat-maab likkhun

yahi bahut hai ki in labon ko sada se mahrum kar ke rakh dun

magar ye kaisi musalahat hai samundaron ko sarab likkhun