ajib rang ajab haal mein paDe hue hain

ajiib rañg ajab haal meñ paḌe hue haiñ

ham apne ahd kī pātāl meñ paḌe hue haiñ

suḳhan-sarā.ī koī sahl kaam thoḌī hai

ye log kis liye janjāl meñ paḌe hue haiñ

uThā ke haath pe duniyā ko dekh saktā huuñ

sabhī nazāre bas ik thaal meñ paḌe hue haiñ

jahāñ bhī chāhūñ maiñ manzar uThā ke le jā.ūñ

ki ḳhvāb dīda-e-amvāl meñ paḌe hue haiñ

maiñ shaam hote hī gardūñ pe Daal aatā huuñ

sitāre lipTī huī shaal meñ paḌe hue haiñ

vo tū ki apne ta.iiñ kar chukā hameñ takmīl

ye ham ki fikr-e-ḳhad-o-ḳhāl meñ paḌe hue haiñ

isī liye ye vatan chhoḌ kar nahīñ jaate

ki ham tasavvur-e-'iqbāl' meñ paḌe hue haiñ

savāb hī to nahīñ jin kā phal milegā mujhe

gunāh bhī mire a.amāl meñ paḌe hue haiñ

tamām aks mirī dastaras meñ haiñ 'āzar'

ye aa.ine mirī timsāl meñ paḌe hue haiñ

ajib rang ajab haal mein paDe hue hain

hum apne ahd ki patal mein paDe hue hain

suKHan-sarai koi sahl kaam thoDi hai

ye log kis liye janjal mein paDe hue hain

uTha ke hath pe duniya ko dekh sakta hun

sabhi nazare bas ek thaal mein paDe hue hain

jahan bhi chahun main manzar uTha ke le jaun

ki KHwab dida-e-amwal mein paDe hue hain

main sham hote hi gardun pe Dal aata hun

sitare lipTi hui shaal mein paDe hue hain

wo tu ki apne tain kar chuka hamein takmil

ye hum ki fikr-e-KHad-o-KHal mein paDe hue hain

isi liye ye watan chhoD kar nahin jate

ki hum tasawwur-e-'iqbaal' mein paDe hue hain

sawab hi to nahin jin ka phal milega mujhe

gunah bhi mere aamal mein paDe hue hain

tamam aks meri dastaras mein hain 'azar'

ye aaine meri timsal mein paDe hue hain