ajib rang the dil mein jo aansuon mein na the

ajiib rañg the dil meñ jo āñsuoñ meñ na the

pas-e-mizha the vo chehre ki chilmanoñ meñ na the

jo ro chuke to yahī bolte dar-o-dīvār

hue ḳhamosh ki jaise kabhī gharoñ meñ na the

hamārī vaz.a ne pābandiyāñ qubūl na kiiñ

misāl-e-nashsha the ham aur sāġharoñ meñ na the

chale to apnī hī raftār se ulajh ke gire

havā kī tarah muqayyad jo fāsloñ meñ na the

chaman meñ rah ke vo kāñTe chubho liye ham ne

ki itne rañg to shāyad yahāñ guloñ meñ na the

fanā kā ḳhauf thā mahmez chalne vāloñ kā

ye hausle kabhī TuuTe hue paroñ meñ na the

baḌā aziim musavvir thā Dūbtā sūraj

shafaq ke rañg magar bujhte rauzanoñ meñ na the

ajib rang the dil mein jo aansuon mein na the

pas-e-mizha the wo chehre ki chilmanon mein na the

jo ro chuke to yahi bolte dar-o-diwar

hue KHamosh ki jaise kabhi gharon mein na the

hamari waza ne pabandiyan qubul na kin

misal-e-nashsha the hum aur sagharon mein na the

chale to apni hi raftar se ulajh ke gire

hawa ki tarah muqayyad jo faslon mein na the

chaman mein rah ke wo kanTe chubho liye hum ne

ki itne rang to shayad yahan gulon mein na the

fana ka KHauf tha mahmez chalne walon ka

ye hausle kabhi TuTe hue paron mein na the

baDa azim musawwir tha Dubta suraj

shafaq ke rang magar bujhte rauzanon mein na the