ajib rut hai daraKHton ko be-zaban dekhun

ajiib rut hai daraḳhtoñ ko be-zabāñ dekhūñ

dayār-e-shām meñ aahoñ kā maiñ dhuāñ dekhūñ

chahār samt se aa.ī thī barf kī āñdhī

kahīñ na phuul na rañgoñ kī titliyāñ dekhūñ

yaqīn un ko dilā.ūñ chamakte sūraj kā

hisār-e-shab meñ jo sahme hue makāñ dekhūñ

zamīñ ko tū ne Darāyā sadā masā.ib se

kabhī tujhe bhī hirāsāñ ai āsmāñ dekhūñ

laboñ pe jis ke musalsal pukār paanī kī

usī kī aañkh se dariyā bhī ik ravāñ dekhūñ

lahū-luhān to koī nazar nahīñ aatā

lahū meñ Duubī magar sab kī uñgliyāñ dekhūñ

hamāre ahd ke logoñ ko kyā huā 'fikrī'

sabhoñ meñ bujhtī huī aag kā samāñ dekhūñ

ajib rut hai daraKHton ko be-zaban dekhun

dayar-e-sham mein aahon ka main dhuan dekhun

chahaar samt se aai thi barf ki aandhi

kahin na phul na rangon ki titliyan dekhun

yaqin un ko dilaun chamakte suraj ka

hisar-e-shab mein jo sahme hue makan dekhun

zamin ko tu ne Daraya sada masaib se

kabhi tujhe bhi hirasan ai aasman dekhun

labon pe jis ke musalsal pukar pani ki

usi ki aankh se dariya bhi ek rawan dekhun

lahu-luhan to koi nazar nahin aata

lahu mein Dubi magar sab ki ungliyan dekhun

hamare ahd ke logon ko kya hua 'fikri'

sabhon mein bujhti hui aag ka saman dekhun