ajib shaKHs hai ki bad-hawas tak bhi nahin

ajiib shaḳhs hai ki bad-havās tak bhī nahīñ

vo qatl kartā hai aur phir udaas tak bhī nahīñ

na mujh ko ahl-e-ḳhirad kī safoñ meñ Thahrāo

mire nasīb meñ apne havās tak bhī nahīñ

vo ḳhud ko ḳhizr se detā rahā thā tashbīheñ

sadā dī dasht meñ to us kī baas tak bhī nahīñ

kahāñ se badlegā hur kī tarah tumhārā nasīb

tumhāre shahr meñ ik haq-shanās tak bhī nahīñ

ham apnī pyaas bujhā.eñ to kis tarah 'naqvī'

hamāre hisse meñ ḳhālī gilās tak bhī nahīñ

ajib shaKHs hai ki bad-hawas tak bhi nahin

wo qatl karta hai aur phir udas tak bhi nahin

na mujh ko ahl-e-KHirad ki safon mein Thahrao

mere nasib mein apne hawas tak bhi nahin

wo KHud ko KHizr se deta raha tha tashbihen

sada di dasht mein to us ki bas tak bhi nahin

kahan se badlega hur ki tarah tumhaara nasib

tumhaare shahr mein ek haq-shanas tak bhi nahin

hum apni pyas bujhaen to kis tarah 'naqwi'

hamare hisse mein KHali gilas tak bhi nahin