ajib shaKHs hai patthar se par banata hai

ajiib shaḳhs hai patthar se par banātā hai

dayār-e-sañg meñ shīsha kā ghar banātā hai

jo zaḳhm phuul kī pattī kā sah sakā na kabhī

us aabla ko vo apnī sipar banātā hai

fazā kā bojh samajhtā hai chāñd sūraj ko

vo gardanoñ pe sajāne ko sar banātā hai

jahāñ se qāfila-e-vaqt raah bhūlā thā

unhīñ sarāboñ meñ vo rah-guzar banātā hai

tarāshtā hai jigar vo bhī ābgīnoñ se

ḳhazaf ko kāsa-e-arz-e-hunar banātā hai

dil-o-nazar ke fusūñ us ko raas aa na sake

vo ā.inoñ se guzarne ko dar banātā hai

ye kis se kahiye ki 'tanvīr' ḳhud salīboñ ko

sukūn-e-jāñ ke liye ham-safar banātā hai

ajib shaKHs hai patthar se par banata hai

dayar-e-sang mein shisha ka ghar banata hai

jo zaKHm phul ki patti ka sah saka na kabhi

us aabla ko wo apni sipar banata hai

faza ka bojh samajhta hai chand suraj ko

wo gardanon pe sajaane ko sar banata hai

jahan se qafila-e-waqt rah bhula tha

unhin sarabon mein wo rah-guzar banata hai

tarashta hai jigar wo bhi aabginon se

KHazaf ko kasa-e-arz-e-hunar banata hai

dil-o-nazar ke fusun us ko ras aa na sake

wo aainon se guzarne ko dar banata hai

ye kis se kahiye ki 'tanwir' KHud salibon ko

sukun-e-jaan ke liye ham-safar banata hai