ajib taur ke tewar dikha gaya ek shaKHs

ajiib taur ke tevar dikhā gayā ik shaḳhs

hañsī hañsī meñ har ik ko rulā gayā ik shaḳhs

hamāre us se dil-o-jāñ ke saikḌoñ rishte

hamīñ se saaf nigāheñ churā gayā ik shaḳhs

maza to jab hai ki saarā zamāna kah uTThe

usī kī chaah meñ ḳhud ko miTā gayā ik shaḳhs

jo bujh gayā to huā aur bhī daraḳhshanda

charāġh aise lahū ke jalā gayā ik shaḳhs

ye aur baat ki vo ham se duur duur rahā

dil-o-dimāġh pe vaise to chhā gayā ik shaḳhs

kuchh is tarah se shagufta harīm-e-jāñ meñ huā

nafas nafas meñ mahak sī rachā gayā ik shaḳhs

hamāre qurb se jis ko gurez rahtā thā

misāl-e-ḳhūn-e-rag-e-jāñ samā gayā ik shaḳhs

ye us kī ishva-tarāzī kā ik karishma hai

ki yaad aa ke har ik ko bhulā gayā ik shaḳhs

ajib taur ke tewar dikha gaya ek shaKHs

hansi hansi mein har ek ko rula gaya ek shaKHs

hamare us se dil-o-jaan ke saikDon rishte

hamin se saf nigahen chura gaya ek shaKHs

maza to jab hai ki sara zamana kah uTThe

usi ki chah mein KHud ko miTa gaya ek shaKHs

jo bujh gaya to hua aur bhi daraKHshanda

charagh aise lahu ke jala gaya ek shaKHs

ye aur baat ki wo hum se dur dur raha

dil-o-dimagh pe waise to chha gaya ek shaKHs

kuchh is tarah se shagufta harim-e-jaan mein hua

nafas nafas mein mahak si racha gaya ek shaKHs

hamare qurb se jis ko gurez rahta tha

misal-e-KHun-e-rag-e-jaan sama gaya ek shaKHs

ye us ki ishwa-taraazi ka ek karishma hai

ki yaad aa ke har ek ko bhula gaya ek shaKHs