ajib zulm hai sayyaad ki hawas ki tarah

ajiib zulm hai sayyād kī havas kī tarah

sulūk kartā hai mujh se chaman qafas kī tarah

hamāre dam se haiñ mahfūz-o-shād barg-o-saman

hameñ na pheñk chaman se yuuñ ḳhār-o-ḳhas kī tarah

maiñ apne vāste amrit kahāñ juTātā huuñ

maiñ apne ras ke ḳhazāne pe huuñ magas kī tarah

zarūr tū hai numāyāñ sitamgarī meñ zarūr

hamārā dard bhī baḌhtā hai tere jas kī tarah

koī ḳhulūs milā kar agar pilā.e to

surūr chhāchh bhī detī hai somras kī tarah

kisī ne jaal bichhāyā hai ġhaur se dekho

ki shāḳh shāḳh gulistāñ meñ hai chakas kī tarah

bahut ajiib kahānī hai mere aalam kī

banā sifar se huuñ maiñ ek anek das kī tarah

agar maiñ huuñ to maiñ huuñ aur agar gayā to gayā

maiñ mo'atabar nahīñ nā-mo'tabar nafas kī tarah

na jaane kaun se jangal kā jiiv hai vaa.iz

sharāb piitā hai kam-baḳht bul-havas kī tarah

ye buzdilī kā tilism ab to toḌ de 'kundan'

ki baañg detī hai pāzeb bhī jaras kī tarah

ajib zulm hai sayyaad ki hawas ki tarah

suluk karta hai mujh se chaman qafas ki tarah

hamare dam se hain mahfuz-o-shad barg-o-saman

hamein na phenk chaman se yun KHar-o-KHas ki tarah

main apne waste amrit kahan juTata hun

main apne ras ke KHazane pe hun magas ki tarah

zarur tu hai numayan sitamgari mein zarur

hamara dard bhi baDhta hai tere jas ki tarah

koi KHulus mila kar agar pilae to

surur chhachh bhi deti hai somras ki tarah

kisi ne jal bichhaya hai ghaur se dekho

ki shaKH shaKH gulistan mein hai chakas ki tarah

bahut ajib kahani hai mere aalam ki

bana sifar se hun main ek anek das ki tarah

agar main hun to main hun aur agar gaya to gaya

main mo'atabar nahin na-mo'tabar nafas ki tarah

na jaane kaun se jangal ka jiw hai waiz

sharab pita hai kam-baKHt bul-hawas ki tarah

ye buzdili ka tilism ab to toD de 'kundan'

ki bang deti hai pazeb bhi jaras ki tarah