ajnabi ban ke hain log aae hue

ajnabī ban ke haiñ log aa.e hue

bazm meñ dost bhī sab parā.e hue

baat se baat baḌhtī ga.ī yaad kī

ham isī yaad ke haiñ satā.e hue

bolte haiñ zabāñ jo kisī aur kī

vo kahāñ haiñ hamāre sikhā.e hue

us nazar kī adā hai ki us ne mujhe

dekh kar bhī nazar haiñ jhukā.e hue

vo pahelī nahīñ jo sulajh na sake

koī ġham hai use ḳhud chhupā.e hue

baaz atā nahīñ apnī fitrat se vo

aaj phir hai tavajjoh haTā.e hue

haar ke rāstoñ se guzar ke milā

qāfila jiit kā sar uThā.e hue

tū mire shahr aa jā kabhī shaam ko

ham nazar raah meñ haiñ bichhā.e hue

jo chalā jā rahā apnī dhun meñ magan

phir bhī 'nik.hat' use hai manā.e hue

ajnabi ban ke hain log aae hue

bazm mein dost bhi sab parae hue

baat se baat baDhti gai yaad ki

hum isi yaad ke hain satae hue

bolte hain zaban jo kisi aur ki

wo kahan hain hamare sikhae hue

us nazar ki ada hai ki us ne mujhe

dekh kar bhi nazar hain jhukae hue

wo paheli nahin jo sulajh na sake

koi gham hai use KHud chhupae hue

baz ata nahin apni fitrat se wo

aaj phir hai tawajjoh haTae hue

haar ke raston se guzar ke mila

qafila jit ka sar uThae hue

tu mere shahr aa ja kabhi sham ko

hum nazar rah mein hain bichhae hue

jo chala ja raha apni dhun mein magan

phir bhi 'nikhat' use hai manae hue