ajnabi dil ki ajab tarz-e-bayan thi pahle

ajnabī dil kī ajab tarz-e-bayāñ thī pahle

lab thī tasvīr nigāhoñ meñ zabāñ thī pahle

ham ne tā-sub.h jalā.e haiñ vafāoñ ke charāġh

tere kūcha meñ bhī qadar-e-dil-o-jāñ thī pahle

aaj har gaam pe zanjīr hai har baat pe daar

itnī maqbūl kahīñ umr-e-ravāñ thī pahle

dair-o-ka.aba se nikal aa.e to ārām milā

ham ko bhī ik ḳhalish-e-sūd-o-ziyāñ thī pahle

husn-e-yūsuf ko milī ḳhidmat-e-zindāñ 'saifī'

be-gunāhī bhī baḌī āfat-e-jāñ thī pahle

ajnabi dil ki ajab tarz-e-bayan thi pahle

lab thi taswir nigahon mein zaban thi pahle

hum ne ta-subh jalae hain wafaon ke charagh

tere kucha mein bhi qadar-e-dil-o-jaan thi pahle

aaj har gam pe zanjir hai har baat pe dar

itni maqbul kahin umr-e-rawan thi pahle

dair-o-kaba se nikal aae to aaram mila

hum ko bhi ek KHalish-e-sud-o-ziyan thi pahle

husn-e-yusuf ko mili KHidmat-e-zindan 'saifi'

be-gunahi bhi baDi aafat-e-jaan thi pahle