akela chhoD kar hum ko gaya hai

akelā chhoḌ kar ham ko gayā hai

to kyā vo bhī akelā ho gayā hai

lahū thak kar badan meñ so gayā hai

mirā sarmāya miTTī ho gayā hai

milā yuuñ to bahut māl-e-ġhanīmat

magar kiise kā sikka kho gayā hai

tasalsul kah rahā hai zalzaloñ kā

zamīñ kā jism bodā ho gayā hai

guzar kar merī āñkhoñ se vo saaya

mire fan par musallat ho gayā hai

sadā rahte haiñ barg-o-bār us par

'ajab paudā vo dil meñ bo gayā hai

kabhī dhaḌkā hai dil ban kar hamārā

kabhī āñkhoñ kā aañsū ho gayā hai

akela chhoD kar hum ko gaya hai

to kya wo bhi akela ho gaya hai

lahu thak kar badan mein so gaya hai

mera sarmaya miTTi ho gaya hai

mila yun to bahut mal-e-ghanimat

magar kise ka sikka kho gaya hai

tasalsul kah raha hai zalzalon ka

zamin ka jism boda ho gaya hai

guzar kar meri aankhon se wo saya

mere fan par musallat ho gaya hai

sada rahte hain barg-o-bar us par

'ajab pauda wo dil mein bo gaya hai

kabhi dhaDka hai dil ban kar hamara

kabhi aankhon ka aansu ho gaya hai