aks-e-falak par aaina hai raushan aab zaKHiron ka

aks-e-falak par ā.īna hai raushan aab zaḳhīroñ kā

garm-e-safar hai qāz-e-qāfila sail-e-ravāñ hai tīroñ kā

kaTe hue khetoñ kī muñDeroñ par abrak kī zañgārī

thakī huī miTTī ke sahāre Dher lagā hai hīroñ kā

tez qalam kirnoñ ne banā.e haiñ kyā kyā hairat paikar

jhiil ke Thahre hue paanī par naqsh utrā tasvīroñ kā

kyā kuchh dil kī ḳhākistar par likh ke ga.ī hai mauj-e-havā

paḌhne vaalā koī nahīñ hai in miTtī tahrīroñ kā

reg-e-nafas kā zā.iqa muñh meñ gard-e-mah-o-sāl āñkhoñ meñ

maiñ huuñ 'zeb' aur chaar taraf ik sahrā hai ta.abīroñ kā

aks-e-falak par aaina hai raushan aab zaKHiron ka

garm-e-safar hai qaz-e-qafila sail-e-rawan hai tiron ka

kaTe hue kheton ki munDeron par abrak ki zangari

thaki hui miTTi ke sahaare Dher laga hai hiron ka

tez qalam kirnon ne banae hain kya kya hairat paikar

jhil ke Thahre hue pani par naqsh utra taswiron ka

kya kuchh dil ki KHakistar par likh ke gai hai mauj-e-hawa

paDhne wala koi nahin hai in miTti tahriron ka

reg-e-nafas ka zaiqa munh mein gard-e-mah-o-sal aankhon mein

main hun 'zeb' aur chaar taraf ek sahra hai tabiron ka