aks-e-jaanan meri nigah mein hai

aks-e-jānāñ mirī nigāh meñ hai

husn ab ishq kī panāh meñ hai

tang hai kā.enāt mere liye

itnī vus.at mirī nigāh meñ hai

jitnī pur-kaif hai umīd-e-karam

utnī hī dilkashī gunāh meñ hai

lau nikaltī hai har-bun-e-mū se

soz-e-sad-āh zabt-e-āh meñ hai

apnī manzil kā haal kyā jaane

vo musāfir abhī jo raah meñ hai

aah kī hī nahīñ to kyā ma.alūm

kitnī tāsīr merī aah meñ hai

be-qarārī jo thī mire dil meñ

ab vahī aap kī nigāh meñ hai

dekhte kyā haiñ aap hairat se

naqsh-e-pā aap hī kā maah meñ hai

shaiḳh sāhab kahāñ chale aa.e

mai-kada kyā haram kī raah meñ hai

adl-gustar zarā ḳhayāl rahe

aadmī terī bārgāh meñ hai

saath degī tū ai ḳhirad kab tak

terī manzil to merī raah meñ hai

husn jaisā hai merī duniyā meñ

vo na anjum meñ hai na maah meñ hai

aks-e-jaanan meri nigah mein hai

husn ab ishq ki panah mein hai

tang hai kaenat mere liye

itni wusat meri nigah mein hai

jitni pur-kaif hai umid-e-karam

utni hi dilkashi gunah mein hai

lau nikalti hai har-bun-e-mu se

soz-e-sad-ah zabt-e-ah mein hai

apni manzil ka haal kya jaane

wo musafir abhi jo rah mein hai

aah ki hi nahin to kya malum

kitni tasir meri aah mein hai

be-qarari jo thi mere dil mein

ab wahi aap ki nigah mein hai

dekhte kya hain aap hairat se

naqsh-e-pa aap hi ka mah mein hai

shaiKH sahab kahan chale aae

mai-kada kya haram ki rah mein hai

adl-gustar zara KHayal rahe

aadmi teri bargah mein hai

sath degi tu ai KHirad kab tak

teri manzil to meri rah mein hai

husn jaisa hai meri duniya mein

wo na anjum mein hai na mah mein hai