aks hai be-tabiyon ka dil ki armanon mein kyun

aks hai be-tābiyoñ kā dil kī armānoñ meñ kyuuñ

be-zabāñ shāmil hue jaate haiñ mehmānoñ meñ kyuuñ

ho ga.e dīvāne ruḳhsat bastiyoñ kī samt kyā

chhā ga.iiñ vīrāniyāñ sī phir bayābānoñ meñ kyuuñ

dil kī us be-raunaqī kā zikr jaane dījiye

ho rahī haiñ bastiyāñ tabdīl vīrānoñ meñ kyuuñ

hai raqābat juzv-e-lāzim mehr-o-ulfat kā agar

ijtimā.ī ishq phir hotā hai parvānoñ meñ kyuuñ

kyā kisī kuTiyā ke andar jaag uThī hai zindagī

khalbalī sī paḌ ga.ī mahloñ meñ aivānoñ meñ kyuuñ

bīḳh-kun the jo sitam-rānoñ ke kal tak ai nadīm

ho rahā hai ab shumār un kā sitam-rānoñ meñ kyuuñ

amn ke ḳhvāhāñ haiñ jab 'afsar' jahāñ vaale tamām

kashmakash rahtī hai phir itnī jahāñ-bānoñ meñ kyuuñ

aks hai be-tabiyon ka dil ki armanon mein kyun

be-zaban shamil hue jate hain mehmanon mein kyun

ho gae diwane ruKHsat bastiyon ki samt kya

chha gain viraniyan si phir bayabanon mein kyun

dil ki us be-raunaqi ka zikr jaane dijiye

ho rahi hain bastiyan tabdil viranon mein kyun

hai raqabat juzw-e-lazim mehr-o-ulfat ka agar

ijtimai ishq phir hota hai parwanon mein kyun

kya kisi kuTiya ke andar jag uThi hai zindagi

khalbali si paD gai mahlon mein aiwanon mein kyun

biKH-kun the jo sitam-ranon ke kal tak ai nadim

ho raha hai ab shumar un ka sitam-ranon mein kyun

amn ke KHwahan hain jab 'afsar' jahan wale tamam

kashmakash rahti hai phir itni jahan-banon mein kyun