aks har roz kisi gham ka paDa karta hai

'aks har roz kisī ġham kā paḌā kartā hai

dil vo ā.īna ki chup-chāp takā kartā hai

bahte paanī kī tarah dard kī bhī shakl nahīñ

jab bhī miltā hai nayā ruup huā kartā hai

maiñ to bahrūp huuñ us kā jo hai mere andar

vo koī aur hai jo mujh meñ jiyā kartā hai

rang sā roz bikhar jaatā hai dīvāroñ par

kuchh diye jaisā darīche meñ jalā kartā hai

jaane vo kaun hai jo raat ke sannāTe meñ

kabhī rotā hai kabhī ḳhud pe hañsā kartā hai

roz rāhoñ se guzartā hai sadāoñ kā julūs

dil kā sannāTā magar roz baḌhā kartā hai

'aks har roz kisi gham ka paDa karta hai

dil wo aaina ki chup-chap taka karta hai

bahte pani ki tarah dard ki bhi shakl nahin

jab bhi milta hai naya rup hua karta hai

main to bahrup hun us ka jo hai mere andar

wo koi aur hai jo mujh mein jiya karta hai

rang sa roz bikhar jata hai diwaron par

kuchh diye jaisa dariche mein jala karta hai

jaane wo kaun hai jo raat ke sannaTe mein

kabhi rota hai kabhi KHud pe hansa karta hai

roz rahon se guzarta hai sadaon ka julus

dil ka sannaTa magar roz baDha karta hai