aks TuTa hai barha mera

aks TuuTā hai bārhā merā

sañg-e-ḳhārā hai aa.ina merā

saarī duniyā mirī muḳhālif hai

ek bachcha hai ham-navā merā

tez bārish kā maiñ parinda huuñ

bādaloñ meñ hai ghoñsla merā

ghar meñ mehmāñ huī hai tanhā.ī

bhar gayā hai bar-āmda merā

do charāġhoñ se raat raushan hai

ek terā hai dūsrā merā

uupar uupar se Thiik lagtā hai

zaḳhm andar se hai harā merā

pūchh lenā kisī parinde se

sab ko ma.alūm hai patā merā

merī tarkīb meñ hai sachchā.ī

kaun chakkhegā zā.iqa merā

kone-khudre bhī ḳhuub raushan haiñ

hujra-e-zāt hai khulā merā

hone lagtī hai baat jab ḳhud se

TuuT jaatā hai rābta merā

kisī manzil kī yaad aate hī

chalne lagtā hai naqsh-e-pā merā

ek parkār ke simaTte hī

phail jaatā hai dā.era merā

ek Thokar se TuuT jā.egā

jism-e-fānī hai bhurbhurā merā

tum zamīnoñ ko nāpte rahnā

kā.enātī hai fāsla merā

thak ke vāpas chalā gayā 'nāsir'

ain manzil se rāsta merā

aks TuTa hai barha mera

sang-e-KHara hai aaina mera

sari duniya meri muKHalif hai

ek bachcha hai ham-nawa mera

tez barish ka main parinda hun

baadalon mein hai ghonsla mera

ghar mein mehman hui hai tanhai

bhar gaya hai bar-amda mera

do charaghon se raat raushan hai

ek tera hai dusra mera

upar upar se Thik lagta hai

zaKHm andar se hai hara mera

puchh lena kisi parinde se

sab ko malum hai pata mera

meri tarkib mein hai sachchai

kaun chakkhega zaiqa mera

kone-khudre bhi KHub raushan hain

hujra-e-zat hai khula mera

hone lagti hai baat jab KHud se

TuT jata hai rabta mera

kisi manzil ki yaad aate hi

chalne lagta hai naqsh-e-pa mera

ek parkar ke simaTte hi

phail jata hai daera mera

ek Thokar se TuT jaega

jism-e-fani hai bhurbhura mera

tum zaminon ko napte rahna

kaenati hai fasla mera

thak ke wapas chala gaya 'nasir'

ain manzil se rasta mera