aksar baiThe tanhai ki zulfen hum suljhate hain

aksar baiThe tanhā.ī kī zulfeñ ham suljhāte haiñ

ḳhud se ek kahānī kah kar pahroñ jī bahlāte haiñ

dil meñ ik vīrāna le kar gulshan gulshan jaate haiñ

aas lagā kar ham phūloñ se kyā kyā ḳhaak uḌāte haiñ

mīThī mīThī ek kasak hai bhīnī bhīnī ek mahak

dil meñ chhāle phuuT rahe haiñ phuul se khilte jaate haiñ

bādal goyā dil vaale haiñ Thes lagī aur phuuT bahe

tūfāñ bhī ban jaate haiñ ye motī bhī barsāte haiñ

ham bhī haiñ us des ke baasī lekin ham ko pūchhe kaun

vo bhī haiñ jo terī galī ke naam se rutba paate haiñ

kāñTe to phir kāñTe Thahre kis ko hoñge un se gale

lekin ye ma.asūm shagūfe kyā kyā gul ye khilāte haiñ

uljhe uljhe se kuchh fiqre kuchh be-rabtī lafzoñ kī

khul kar baat kahāñ karte haiñ 'bāqar' baat banāte haiñ

aksar baiThe tanhai ki zulfen hum suljhate hain

KHud se ek kahani kah kar pahron ji bahlate hain

dil mein ek virana le kar gulshan gulshan jate hain

aas laga kar hum phulon se kya kya KHak uDate hain

miThi miThi ek kasak hai bhini bhini ek mahak

dil mein chhaale phuT rahe hain phul se khilte jate hain

baadal goya dil wale hain Thes lagi aur phuT bahe

tufan bhi ban jate hain ye moti bhi barsate hain

hum bhi hain us des ke basi lekin hum ko puchhe kaun

wo bhi hain jo teri gali ke nam se rutba pate hain

kanTe to phir kanTe Thahre kis ko honge un se gale

lekin ye masum shagufe kya kya gul ye khilate hain

uljhe uljhe se kuchh fiqre kuchh be-rabti lafzon ki

khul kar baat kahan karte hain 'baqar' baat banate hain