aksar dayar-e-ishq se ho kar guzar gae

aksar dayār-e-ishq se ho kar guzar ga.e

hañs kar guzar ga.e kabhī ro kar guzar ga.e

khaTkī nigāh-e-shauq meñ gulshan kī ḳhārgī

ham chāk-e-dil ko ġham se piro kar guzar ga.e

patvār TūTne kā huā ranj is qadar

ham naav tund-rau meñ Dubo kar guzar ga.e

baḳhshī hai ahd-e-lutf ne rātoñ kī tīrgī

din husn-e-e.atibār meñ so kar guzar ga.e

manzil se kyā pata ki nikal aa.e duur ham

hosh-o-havās raah meñ kho kar guzar ga.e

guzrī jo un pe shaaq tahī-dāmanī mirī

āñchal ko āñsuoñ meñ bhigo kar guzar ga.e

'rāzī' ko ġham hai mere liye kuchh na kar sake

ye bhī to kam nahīñ hai ki jo kar guzar ga.e

aksar dayar-e-ishq se ho kar guzar gae

hans kar guzar gae kabhi ro kar guzar gae

khaTki nigah-e-shauq mein gulshan ki KHargi

hum chaak-e-dil ko gham se piro kar guzar gae

patwar TuTne ka hua ranj is qadar

hum naw tund-rau mein Dubo kar guzar gae

baKHshi hai ahd-e-lutf ne raaton ki tirgi

din husn-e-eatibar mein so kar guzar gae

manzil se kya pata ki nikal aae dur hum

hosh-o-hawas rah mein kho kar guzar gae

guzri jo un pe shaq tahi-damani meri

aanchal ko aansuon mein bhigo kar guzar gae

'raazi' ko gham hai mere liye kuchh na kar sake

ye bhi to kam nahin hai ki jo kar guzar gae