alamat hai ye kaisi is taghayyur ka sabab kya hai

alāmat hai ye kaisī is taġhayyur kā sabab kyā hai

hare pattoñ pe harf-e-zard kyoñ mausam ne likkhā hai

ḳhutūt-e-āgahī pe jam ke mahkā hai lahū merā

salīb-e-fikr pe laTkā huā jab mujh ko dekhā hai

kahīñ dekhe na jā.eñge jahāñ meñ ham se dīvāne

fareb-e-ārzū ham ne har ik manzil pe khāyā hai

sadāqat kī sadā.eñ dar se Takrā ke palaT aa.iiñ

makīñ shāyad abhī tak dhuup kī chādar meñ lipTā hai

ḳhizāñ aa.ī to jaane sūrat-e-hālāt kyā hogī

abhī tak to nigār-e-gul kā chehra ḳhuub nikhrā hai

nizām-e-āsmāñ bhī ek sā mausam nahīñ rakhtā

kabhī taare chamakte haiñ kabhī sūraj nikaltā hai

ravāñ hai kaun sī manzil ko ye aThkheliyāñ kartī

nadī ko kyā ḳhabar merā samundar kitnā pyāsā hai

alamat hai ye kaisi is taghayyur ka sabab kya hai

hare patton pe harf-e-zard kyon mausam ne likkha hai

KHutut-e-agahi pe jam ke mahka hai lahu mera

salib-e-fikr pe laTka hua jab mujh ko dekha hai

kahin dekhe na jaenge jahan mein hum se diwane

fareb-e-arzu hum ne har ek manzil pe khaya hai

sadaqat ki sadaen dar se Takra ke palaT aain

makin shayad abhi tak dhup ki chadar mein lipTa hai

KHizan aai to jaane surat-e-haalat kya hogi

abhi tak to nigar-e-gul ka chehra KHub nikhra hai

nizam-e-asman bhi ek sa mausam nahin rakhta

kabhi tare chamakte hain kabhi suraj nikalta hai

rawan hai kaun si manzil ko ye aThkheliyan karti

nadi ko kya KHabar mera samundar kitna pyasa hai