alam bhi haar gae yar be-dili dekho

alam bhī haar ga.e yaar be-dilī dekho

jiye baġhair hī ik umr kaaT dī dekho

guzar chukā hai zamāna kise guzārūñ maiñ

mujhe guzār rahī hai ye zindagī dekho

mire mizāj kī saḳhtī pe tanz karte ho

kabhī to dekhne vaalo mujhe sahī dekho

dil-o-dimāġh pe qābiz hai vaqt kā sahrā

sarāb ḳhvāb meñ dikhte haiñ tishnagī dekho

shab-e-firāq hai maiñ huuñ suḳhan kī mahfil hai

jo mujh ko dekhnā chāho to bas abhī dekho

yahī to ek hunar hai jo maiñ ne sīkhā hai

dikhānā chāhūñ maiñ tum ko jo tum vahī dekho

na.e charāġh hī jal-jal ke raushnī deñge

'bahar' ko dekhne vaalo ḳhayāl bhī dekho

ma.ānī zabt ke āñgan se rabt karte haiñ

phaloñ ke bojh se ik shāḳh jhuk ga.ī dekho

baḌī bahan kī purānī frock iid ke din

kisī ġharīb kī beTī kī bebasī dekho

hazār raat kā jaagā thā so gayā 'shāriq'

'qamar' kī aaj bujhī sī hai raushnī dekho

alam bhi haar gae yar be-dili dekho

jiye baghair hi ek umr kaT di dekho

guzar chuka hai zamana kise guzarun main

mujhe guzar rahi hai ye zindagi dekho

mere mizaj ki saKHti pe tanz karte ho

kabhi to dekhne walo mujhe sahi dekho

dil-o-dimagh pe qabiz hai waqt ka sahra

sarab KHwab mein dikhte hain tishnagi dekho

shab-e-firaq hai main hun suKHan ki mahfil hai

jo mujh ko dekhna chaho to bas abhi dekho

yahi to ek hunar hai jo main ne sikha hai

dikhana chahun main tum ko jo tum wahi dekho

nae charagh hi jal-jal ke raushni denge

'bahar' ko dekhne walo KHayal bhi dekho

maani zabt ke aangan se rabt karte hain

phalon ke bojh se ek shaKH jhuk gai dekho

baDi bahan ki purani frock id ke din

kisi gharib ki beTi ki bebasi dekho

hazar raat ka jaga tha so gaya 'shaariq'

'qamar' ki aaj bujhi si hai raushni dekho