alam ki had hai kahan be-kasi kahan tak hai

alam kī had hai kahāñ be-kasī kahāñ tak hai

hamāre ġham meñ tumhārī ḳhushī kahāñ tak hai

bajā ki phuul kī do roza zindagī hogī

kalī se koī ye pūchhe kalī kahāñ tak hai

farishte sajda-e-tāzīm par hue majbūr

mirā niyāz mirī bandagī kahāñ tak hai

nazar kā qasd hī kab thā tire jamāl kī diid

ye dekhnā thā faqat raushnī kahāñ tak hai

darindagī kā musalsal mahāz hai qaa.em

ye dekhne ke liye aadmī kahāñ tak hai

tumhāre naam se duniyā mujhe pukār uThī

tumhārī zaat se vābastagī kahāñ tak hai

niyāz-mandī ko ehsās dekhnā ye hai

mizāj-e-husn kī āshuftagī kahāñ tak hai

alam ki had hai kahan be-kasi kahan tak hai

hamare gham mein tumhaari KHushi kahan tak hai

baja ki phul ki do roza zindagi hogi

kali se koi ye puchhe kali kahan tak hai

farishte sajda-e-tazim par hue majbur

mera niyaz meri bandagi kahan tak hai

nazar ka qasd hi kab tha tere jamal ki did

ye dekhna tha faqat raushni kahan tak hai

darindagi ka musalsal mahaz hai qaem

ye dekhne ke liye aadmi kahan tak hai

tumhaare nam se duniya mujhe pukar uThi

tumhaari zat se wabastagi kahan tak hai

niyaz-mandi ko ehsas dekhna ye hai

mizaj-e-husn ki aashuftagi kahan tak hai