allah allah KHun-e-ghariban

allāh allāh ḳhūn-e-ġharībāñ

har taraf ho rahā hai charāġhāñ

hashr-bar-dosh mahshar-ba-dāmāñ

aane vaalā hai phir koī tūfāñ

vaqt har zaḳhm-e-dil kī davā hai

kaun le ahl-e-duniyā kā ehsāñ

zindagī kī haqīqat hī kyā hai

zindagī ek ḳhvāb-e-pareshāñ

kaun hai jo kare pursish-e-ġham

vo gurezāñ to duniyā gurezāñ

ik tabassum bhī bas meñ nahīñ hai

kitnā majbūr hai aaj insāñ

kyā bujhegī ḳhizāñ ke lahū se

tez hai tishnagī-e-bahārāñ

chain dil ko kahīñ bhī nahīñ hai

ek hai āshiyāñ ho ki zindāñ

log rāhoñ meñ dam toḌte haiñ

maut pahle na thī itnī arzāñ

kuchh na bigḌegā urdu zabāñ kā

kyoñ 'ḳhalish' ho rahe ho harāsāñ

allah allah KHun-e-ghariban

har taraf ho raha hai charaghan

hashr-bar-dosh mahshar-ba-daman

aane wala hai phir koi tufan

waqt har zaKHm-e-dil ki dawa hai

kaun le ahl-e-duniya ka ehsan

zindagi ki haqiqat hi kya hai

zindagi ek KHwab-e-pareshan

kaun hai jo kare pursish-e-gham

wo gurezan to duniya gurezan

ek tabassum bhi bas mein nahin hai

kitna majbur hai aaj insan

kya bujhegi KHizan ke lahu se

tez hai tishnagi-e-bahaaran

chain dil ko kahin bhi nahin hai

ek hai aashiyan ho ki zindan

log rahon mein dam toDte hain

maut pahle na thi itni arzan

kuchh na bigDega urdu zaban ka

kyon 'KHalish' ho rahe ho harasan