allah allah ye kya anjuman-arai hai

allāh allāh ye kyā anjuman-ārā.ī hai

ḳhud tamāshā hai vahī aap tamāshā.ī hai

dard ko jis ke taraste haiñ malak aur falak

shīsha-e-dil meñ mire vo mai-e-mīnā.ī hai

aah us tā.ir-e-majbūr kī hasrat ko na pūchh

jo ye suntā ho qafas meñ ki bahār aa.ī hai

jis ke jalve kā farishtoñ ne kiyā thā sajda

koh-e-fārāñ pe vahī sho.ala-e-sīnā.ī hai

tum jo aa jaao to is ishq kā parda rah jaa.e

varna ab zabt hai baaqī na shakebā.ī hai

maiñ use ḳhuub samajhtā huuñ jo hālat hai mirī

haañ magar dil ko vahī dars-e-shakebā.ī hai

ho jahāñ murġh-e-taḳhayyul kī na parvāz-e-rasā

us bulandī pe mirī nāsiya-farsā.ī hai

hai ye 'sāqib' usī ik jalva-e-rañgīñ kā asar

mire shīsha meñ jo kuchh bāda-e-mīnā.ī hai

allah allah ye kya anjuman-arai hai

KHud tamasha hai wahi aap tamashai hai

dard ko jis ke taraste hain malak aur falak

shisha-e-dil mein mere wo mai-e-minai hai

aah us tair-e-majbur ki hasrat ko na puchh

jo ye sunta ho qafas mein ki bahaar aai hai

jis ke jalwe ka farishton ne kiya tha sajda

koh-e-faran pe wahi shoala-e-sinai hai

tum jo aa jao to is ishq ka parda rah jae

warna ab zabt hai baqi na shakebai hai

main use KHub samajhta hun jo haalat hai meri

han magar dil ko wahi dars-e-shakebai hai

ho jahan murgh-e-taKHayyul ki na parwaz-e-rasa

us bulandi pe meri nasiya-farsai hai

hai ye 'saqib' usi ek jalwa-e-rangin ka asar

mere shisha mein jo kuchh baada-e-minai hai