allah re ye rang ye jalwa shabab ka

allāh re ye rang ye jalva shabāb kā

jaise khiñchā ho aañkh meñ naqsha sharāb kā

parde meñ kā.enāt ke maujūd har jagah

is par ye ehtimām ye aalam hijāb kā

lalchā ke fart-e-shauq meñ aañsū nikal paḌe

vaa.iz ne hañs ke naam liyā jab sharāb kā

tāb-e-nazāra-e-ruḳh-e-anvar nahīñ use

sūraj kī samt ruḳh hai gul-e-āftāb kā

baḌhtī rahī nigāh bahakte rahe qadam

guzrā hai is tarah bhī zamāna shabāb kā

har ashk vāqi.āt-e-hasīñ kī hai yādgār

aalam na pūchhiye mirī chashm-e-pur-āb kā

ai 'aish' jab se bāda-e-lā-taqnatū milā

baaqī rahā na Dar hameñ roz-e-hisāb kā

allah re ye rang ye jalwa shabab ka

jaise khincha ho aankh mein naqsha sharab ka

parde mein kaenat ke maujud har jagah

is par ye ehtimam ye aalam hijab ka

lalcha ke fart-e-shauq mein aansu nikal paDe

waiz ne hans ke nam liya jab sharab ka

tab-e-nazara-e-ruKH-e-anwar nahin use

suraj ki samt ruKH hai gul-e-aftab ka

baDhti rahi nigah bahakte rahe qadam

guzra hai is tarah bhi zamana shabab ka

har ashk waqiat-e-hasin ki hai yaadgar

aalam na puchhiye meri chashm-e-pur-ab ka

ai 'aish' jab se baada-e-la-taqnatu mila

baqi raha na Dar hamein roz-e-hisab ka