amin-e-ghairat-e-ulfat jo zindagi hogi

amīn-e-ġhairat-e-ulfat jo zindagī hogī

vo be-ḳhudī meñ bhī shā.ista-e-ḳhudī hogī

jo maslahat pe zarūrat ko Tāltī hogī

vo zindagī nahīñ tauhīn-e-zindagī hogī

nigāh kar le ḳhud apne zamīr par duniyā

hamārā zarf to duniyā bhī jāntī hogī

mahall-e-sajda jahāñ hogā sar jhukegā vahīñ

asīr-e-qaid-e-ta.ayyun na bandagī hogī

is e'timād pe har ġham meñ muskurātā huuñ

huī hai shaam to 'muḳhtār' sub.h bhī hogī

amin-e-ghairat-e-ulfat jo zindagi hogi

wo be-KHudi mein bhi shaista-e-KHudi hogi

jo maslahat pe zarurat ko Talti hogi

wo zindagi nahin tauhin-e-zindagi hogi

nigah kar le KHud apne zamir par duniya

hamara zarf to duniya bhi jaanti hogi

mahall-e-sajda jahan hoga sar jhukega wahin

asir-e-qaid-e-tayyun na bandagi hogi

is e'timad pe har gham mein muskuraata hun

hui hai sham to 'muKHtar' subh bhi hogi