amiq chheD ghazal gham ki intiha kab hai

'amīq' chheḌ ġhazal ġham kī intihā kab hai

ye mālve kī junūñ-ḳhez chaudhvīñ shab hai

mujhe shikāyat-e-talḳhī-e-zahar-e-ġham kab hai

mire laboñ pe abhī kaif-e-shakkr-e-lab hai

lakīr khiñchtī chalī jā rahī hai ta-ba-jigar

faroġh-e-mai hai ki mashq-e-jarāhat-e-shab hai

ye mahviyat hai ki ro.ab-e-jamāl hai taarī

ḳhilāf-e-rasm-e-junūñ dil bahut muaddab hai

kabhī haram meñ hai kāfir to dair meñ momin

na jaane kyā dil-e-dīvāna terā maz.hab hai

bahut muhāl thā varna ki dil fareb meñ aa.e

kisī ke ġham se ġham-e-kā.enāt kī chhab hai

chaman meñ phuul khilātī phire bahār to kyā

kisī ke band-e-qabā TūTne lageñ tab hai

'amiq' chheD ghazal gham ki intiha kab hai

ye malwe ki junun-KHez chaudhwin shab hai

mujhe shikayat-e-talKHi-e-zahar-e-gham kab hai

mere labon pe abhi kaif-e-shakkr-e-lab hai

lakir khinchti chali ja rahi hai ta-ba-jigar

farogh-e-mai hai ki mashq-e-jarahat-e-shab hai

ye mahwiyat hai ki roab-e-jamal hai tari

KHilaf-e-rasm-e-junun dil bahut muaddab hai

kabhi haram mein hai kafir to dair mein momin

na jaane kya dil-e-diwana tera mazhab hai

bahut muhaal tha warna ki dil fareb mein aae

kisi ke gham se gham-e-kaenat ki chhab hai

chaman mein phul khilati phire bahaar to kya

kisi ke band-e-qaba TuTne lagen tab hai