amir-e-shahr is ek baat se KHafa hai bahut

amīr-e-shahr is ik baat se ḳhafā hai bahut

ki shahr bhar meñ sag-e-dard chīḳhtā hai bahut

har ek zaḳhm se zaḳhmoñ kī koñpleñ phūTīñ

jo baaġh tum ne lagāyā thā ab harā hai bahut

zarā sī narm-ravī se pahuñch ga.e dil tak

tanāv thā to samajhte the fāsla hai bahut

jo dam ghuTe to shikāyat na kījiye sāhab

ki saañs lene ko zahroñ bharī havā hai bahut

charāġh lākhoñ hoñ raushan nazar nahīñ aate

yahāñ to chehra-parastoñ ko ik diyā hai bahut

ye tai hai mujh se kabhī tark haq nahīñ hogā

ki merī ḳhaak meñ ye kīmiyā milā hai bahut

mumāsalat ke havāloñ meñ mat talāsh karo

umūmiyat se hamārī ġhazal judā hai bahut

amir-e-shahr is ek baat se KHafa hai bahut

ki shahr bhar mein sag-e-dard chiKHta hai bahut

har ek zaKHm se zaKHmon ki konplen phuTin

jo bagh tum ne lagaya tha ab hara hai bahut

zara si narm-rawi se pahunch gae dil tak

tanaw tha to samajhte the fasla hai bahut

jo dam ghuTe to shikayat na kijiye sahab

ki sans lene ko zahron bhari hawa hai bahut

charagh lakhon hon raushan nazar nahin aate

yahan to chehra-paraston ko ek diya hai bahut

ye tai hai mujh se kabhi tark haq nahin hoga

ki meri KHak mein ye kimiya mila hai bahut

mumasalat ke hawalon mein mat talash karo

umumiyat se hamari ghazal juda hai bahut