an-ginat hain yahan mehrban dekhiye

an-ginat haiñ yahāñ mehrbāñ dekhiye

kaun degā magar apnī jaañ dekhiye

kis tarah dariyā bantā hai qatra koī

jānñā hai to āb-e-ravāñ dekhiye

ḳhaak terā makāñ bhī to jal kar huā

nafratoñ kā uThā hai dhuāñ dekhiye

aap kī haisiyat sūkhe patte sī hai

Thokareñ khā rahe haiñ yahāñ dekhiye

us ke chehre pe hai fikr har dam 'ayāñ

ghar meñ beTī hai jis ke javāñ dekhiye

aaj nā-haq bahegā kisī kā lahū

dast-e-zālim meñ tīr-o-kamāñ dekhiye

shāyad aisī jagah koī tum ko mile

jhuk gayā ho jahāñ āsmāñ dekhiye

jo vatan kī tabāhī kā bā'is rahe

likh rahe haiñ vahī dāstāñ dekhiye

mil ga.ī jab bhī 'ātif' havā kī madad

aag pahuñchī kahāñ se kahāñ dekhiye

an-ginat hain yahan mehrban dekhiye

kaun dega magar apni jaan dekhiye

kis tarah dariya banta hai qatra koi

jaanna hai to aab-e-rawan dekhiye

KHak tera makan bhi to jal kar hua

nafraton ka uTha hai dhuan dekhiye

aap ki haisiyat sukhe patte si hai

Thokaren kha rahe hain yahan dekhiye

us ke chehre pe hai fikr har dam 'ayan

ghar mein beTi hai jis ke jawan dekhiye

aaj na-haq bahega kisi ka lahu

dast-e-zalim mein tir-o-kaman dekhiye

shayad aisi jagah koi tum ko mile

jhuk gaya ho jahan aasman dekhiye

jo watan ki tabahi ka ba'is rahe

likh rahe hain wahi dastan dekhiye

mil gai jab bhi 'atif' hawa ki madad

aag pahunchi kahan se kahan dekhiye